अर्थ समिति, सहसचिव र आईपीओमा १० कित्ताको बहस

नयाँ सरकार बनेसँगै सेयर बजारले चरम निराशा प्रकट गर्दै गर्दा संसद्को अर्थ समितिमा सेयर बजारबारे भएको छलफल सुन्दा समस्याभन्दा पनि समस्यै नभएको विषयमा केन्द्रित भएको देखिन्छ ।

छलफलमा अर्थ मन्त्रालयका सहसचिव महेश आचार्यको भनाइ उपस्थितहरूले निकै ध्यानपूर्वक सुनेको देखिन्छ । उनले सेयर बजारको सबैभन्दा ठूलो समस्या अहिले प्राथमिक निष्कासनमा हुँदै आएको १० कित्ता बाँडफाँड भएको र त्यसलाई पुनरावलोकन गर्नुपर्ने बताए । देशको अर्थतन्त्र सम्हालेको मन्त्रालयका जिम्मेवार कर्मचारीले यो कुरा अवश्य पनि गहिरो अध्ययनको निष्कर्षका आधारमा भनेको हुन सक्छ । तर उनले कुन अध्ययन, कसले गरेको अध्ययन र कहिले, कसरी गरेको अध्ययनको निष्कर्ष हो भन्नेचाहिँ खुलाएनन् ।