वैज्ञानिकहरूले पत्ता लगाए चौथो ‘सरुवा क्यान्सर’

एजेन्सी । सन् २०१२ मा, एक माछा मार्ने व्यक्तिले लेक मेम्फ्रेम्यागोगबाट एउटा खैरो बुलहेड (एक प्रकारको क्याटफिस) समाते, जसको छालामा कालो लेदो दलिएको जस्तो देखिन्थ्यो । उनले त्यो माछा भर्मोन्ट माछा र वन्यजन्तु विभागका माछा जीवविज्ञानी पिटर इमर्सनकहाँ ल्याए, जसले सन् २००९ देखि उक्त तालको सर्वेक्षण गरिरहेका थिए । इमर्सनले यस्तो कुरा पहिले कहिल्यै देखेका थिएनन्।

तीन वर्षभित्रै, तालका करिब २५ देखि ४० प्रतिशत बुलहेडहरूमा त्यस्ता काला गिर्खाहरू (ट्युमर) देखा पर्न थाले । यसै हप्ता युनिभर्सिटी अफ भर्मोन्टका अनुसन्धानकर्ताहरूले ‘नेचर’ पत्रिकामा एउटा प्रतिवेदन सार्वजनिक गर्दै यो ‘मेलानोमा’ (छालाको क्यान्सर) संक्रामक भएको र जीवित क्यान्सर कोशिकाहरूका रूपमा एउटा माछाबाट अर्कोमा सर्ने गरेको खुलासा गरे।