ब्राजिलमा राष्ट्रपति निर्वाचनः बोल्सोनारोका छोरालाई इजरायल र अर्जेन्टिनाको खास समर्थन

एजेन्सी । ब्राजिलका पूर्वराष्ट्रपति जाइर बोल्सोनारोका छोरा फ्लाभियोले आधिकारिक रूपमा आफ्नो राष्ट्रपतिको चुनावी अभियान सुरु गरेका छन् । उनले अर्जेन्टिनाका राष्ट्रपति हाभियर मिलेई र इजरायलका प्रधानमन्त्री बेन्जामिन नेतान्याहुजस्ता दक्षिणपन्थी नेताहरूको समर्थन प्राप्त भएको दाबी गरेका छन् ।

ब्राजिलको राजनीतिक दक्षिणपन्थको प्रमुख उम्मेदवार मानिएका फ्लाभियोले शनिबार वर्तमान राष्ट्रपति लुइज इनासियो लुला दा सिल्भाविरुद्ध उम्मेदवारी घोषणा गरेका हुन् । लिबरल पार्टीको अधिवेशनलाई सम्बोधन गर्दै उनले भने, ‘यो केवल पार्टीको अधिवेशन होइन, हाम्रो जीवनको सबैभन्दा कठिन संघर्षको सुरुआत हो । यो असल र खराबबिचको लडाइँ हो ।’