प्रदेश सरकार गठनमा एमाले-नेकपा सहकार्य, सत्ताका लागि चटारो कि दुरदृष्टि ?

काठमाडौँ । विभिन्न ५ प्रदेशका सरकार गठनमा नेकपा एमाले र नेपाली कम्युनिस्ट पार्टी (नेकपा)बिच सहकार्य गर्ने सहमति भएको छ । प्रदेश सभाको कार्यकाल एक वर्षको हाराहारी बाँकी रहँदा भएको यो सहमतिलाई लिएर विभिन्न टिप्पणी हुन थालेको छ ।

यी दुई दलबिच विगतमा भएका सहकार्य असफल भए पनि फेरि एक पटक नयाँ सहमति भएको छ । साविकको माओवादी केन्द्रसँग नेकपा एकीकृत समाजवादी लगायत विभिन्न दलले एकता गरी नेकपा गठन भएको हो । ०७५ मा एमाले र माओवादी केन्द्रबिच एकता गरी नेपाल कम्युनिस्ट पार्टी गठन भएको थियो । यद्यपि उक्त एकता लामो समय टिकेन । सर्वोच्च अदालतले नेपाल कम्युनिस्ट पार्टी नाम गरेको दल त्यसअघि नै निर्वाचन आयोगमा दर्ता भएको भन्दै एमाले र माओवादी केन्द्रबिच एकता भएर बनेको पार्टीका लागि अर्को नाम राख्न आदेश दिएको थियो । दुवै घटक पार्टीको नयाँ नाम लिएर निर्वाचन आयोगमा जानुको साटो साविककै अवस्थामा फर्कने निधोमा पुगे ।