परीक्षा सुरु भएको ५ मिनेटमै कसले लिक गर्‍यो एमबीएस प्रथम सेमेस्टरको प्रश्नपत्र ?

काठमाडौँ । ह्वाट्सएप ग्रुपमार्फत त्रिभुवन विश्वविद्यालय अन्तर्गतको मास्टर्स इन बिजनेस स्टडिज (एमबीएस) प्रथम सेमेस्टरको प्रश्नपत्र लिक भएको घटनामा दुई जना पक्राउ परेका छन् । केन्द्रीय अनुसन्धान ब्युरो (सीआईबी) ले उक्त घटनामा संलग्न भएको आशङ्कामा आइतबार उनीहरूलाई पक्राउ गरेको हो ।

शुक्रबार (८ साउन) एमबीएसको ‘एमजीटी ५१५: अर्गनाइजेसनल बिहेभियर’ विषयको परीक्षा दिउँसो १२ बजेदेखि सञ्चालन भएको थियो । परीक्षा सुरु भएको करिब पाँच मिनेटपछि एक हजारभन्दा बढी सदस्य भएको ह्वाट्सएप ग्रुपमा प्रश्नपत्र सार्वजनिक भएको हो ।