दक्षिण एसियाका अग्रणी इन्टरनेट अभियन्ता काठमाडौंमा सम्मानित

काठमाडौं । दक्षिण एसियाली नेटवर्क अपरेटर्स ग्रुप (सानोग) को ४४औँ संस्करणमा दक्षिण एसियाका अग्रणी इन्टरनेट अभियन्ताहरूलाई सम्मान गरिएको छ। काठमाडौंमा आइतबारदेखि सुरु भएको तीनदिने सम्मेलनका अवसरमा नेपालसहित भारत, पाकिस्तान, बंगलादेश र भुटानका इन्टरनेट पूर्वाधार विकासमा योगदान पुर्‍याएका अभियन्ताहरूलाई सम्मान गरिएको हो।

इन्टरनेट इनेबलर्सद्वारा जारी विज्ञप्तिअनुसार सम्मानित हुनेमा नेपालका दिलीप अग्रवाल, भारतका नीरज सोनकर र सूचित नन्दा, पाकिस्तानका तारिक मुस्तफा, बंगलादेशका सुमोन अहमद साबिर तथा भुटानका जिचेन थिन्ले रहेका छन्। उनीहरूले इन्टरनेट दैनिक जीवनको अभिन्न हिस्सा बन्नुअघि नै सर्वसाधारणसम्म इन्टरनेटको पहुँच विस्तार गर्न तथा व्यावसायिक इन्टरनेट सेवाको विकासमा उल्लेखनीय योगदान दिएको भन्दै सम्मान गरिएको जनाइएको छ।