वीरगन्जका डाक्टर हड्तालमा उत्रिएपछि अस्पतालको उपचार सेवा ठप्प

आइतबार वीरगन्जमा रहेको नारायणी लगायत सरकारी तथा निजी अस्पतालको सम्पूर्ण उपचार सेवा ठप्प पारेर डाक्टर हड्तालमा उत्रिएपछि उपचार सेवा प्रभावित भएको छ।

नारायणी अस्पतालमा शनिबार चिकित्सकमाथि भएको हातपात र तोडफोडको विरोधमा वीरगन्जका सरकारी तथा निजी अस्पतालका चिकित्सक सम्पूर्ण उपचार सेवा ठप्प पारेर हड्तालमा उत्रिएका हुन्। शनिबार बिहान नारायणी अस्पतालको आकस्मिक कक्षमा उपचारको लागि ल्याइएका वीरगन्ज महानगरपालिका-२५ का ४५ वर्षीय राजकुमार पटेलको उपचारका क्रममा मृत्यु भएको थियो। पटेलको मृत्युपछि आक्रोशित उनका परिवारजन र गाउँलेले अस्पतालमा प्रदर्शन गर्दै आकस्मिक कक्षमा तोडफोड गर्नुका साथै त्यहाँ कार्यरत डा. प्रमोद राममाथि कुटपिट गरेको आरोप छ। कुटपिटबाट घाइते डा. राम आइसियुमा उपचाररत छन्।