जिम्बावेलाई हराउँदै भारतद्वारा टी–ट्वान्टी शृङ्खला ‘क्लिन स्वीप’

काठमाडौँ । भारतले जिम्बावेविरुद्धको तेस्रो तथा अन्तिम टी–ट्वान्टी खेल जित्दै तीन खेलको शृङ्खला ३–० ले आफ्नो नाममा गरेको छ । श्रृंखलाको अन्तिम खेलमा आइतबार भारतले जिम्बावेलाई ३५ रनले पराजित गर्‍यो । भारतको यस जितका नायक युवा ब्याट्सम्यान वैभव सूर्यवंशी रहे, जसले ४९ बलमा ८१ रनको उत्कृष्ट इनिङ्स खेले । आफ्नो यस इनिङ्सका क्रममा उनले ८ चौका र ४ छक्का प्रहार गरे ।

खेलमा गरेको उत्कृष्ट प्रदर्शनका लागि सूर्यवंशीलाई ‘प्लेयर अफ द म्याच’ घोषित गरियो । यसका साथै श्रृंखलाभरिको उत्कृष्ट प्रदर्शनका लागि उनी ‘प्लेयर अफ द सिरिज’ समेत चुनिएका छन् । खेलमा पहिले ब्याटिङ गरेको भारतले निर्धारित २० ओभरमा ५ विकेट गुमाएर १९२ रन बनाएको थियो । भारतका लागि इशान किशनले २९ रन र श्रेयस अय्यरले २७ रनको योगदान दिए ।