बिजुली बिलमा भ्याट जोड्दा आलोचना, प्राधिकरण अब राजस्व विभागको राय अनुसार अघि बढ्ने

काठमाडौं । नेपाल विद्युत् प्राधिकरणले असारमै खपत गरेको बिजुलीको बिल साउनमा पठाउँदा मूल्य अभिवृद्धि कर (भ्याट) जोडेर पठाउन थालेसँगै आलोचना भएपछि आन्तरिक राजस्व विभागसँग राय मागिसकेको छ। विद्युत्मा भ्याट समावेश गरिएको र त्यसबाट उत्पन्न द्विविधालाई लिएर प्राधिकरणले मागेको राय आजै पठाउने तयारी भइरहेको विभागले जनाएको छ।

असारमा खपत भएको बिजुलीको बिल साउनमा जारी हुँदा भ्याट लाग्ने वा नलाग्ने भन्ने विषयमा स्पष्ट कानुनी व्याख्या खोज्दै प्राधिकरणले विभागलाई पत्र लेखेको थियो । साथै, न्यूनतम डिमान्ड चार्जमा भ्याट लागू हुने वा नहुने विषयमा समेत विभागको धारणा मागिएको प्राधिकरणले विभागलाई पठाइएको पत्रमा उल्लेख छ । प्राधिकरणका अनुसार विभागबाट प्राप्त हुने आधिकारिक रायका आधारमा आगामी महिनाको बिलमा आवश्यक मूल्य समायोजन गरिनेछ ।