सीडीओको आदेशबिनै सुनसरीमा कसरी चल्यो २५ राउण्ड गोली ?

सुनसरीको देवानगञ्ज गाउँपालिका–३ कप्तानगञ्ज गएराति भएको घटनामा प्रमुख जिल्ला अधिकारी वासुदेव घिमिरेले गोली हान्ने आदेश नदिएको खुलेको छ । जिल्ला प्रहरी कार्यालय सुनसरीका निमित्त डीएसपी चन्द्रबहादुर खडकाले सीडीओले गोली हान्ने आदेश नदिएको बताए । उनका अनुसार घटनास्थलमा नेपाल प्रहरी र सशस्त्र प्रहरी दुवैले गोली चलाएका थिए । ‘हाम्रो देवागञ्जको इन्स्पेक्टसा‘वले ३ राउन्ड हवाई फायर गर्नुभएको छ,’ डीएसपी खडकाले लोकान्तरसँग भने, ‘सशस्त्रको तर्फबाट २२ राउन्ड भएको छ । थप अनुसन्धान भइरहेको छ ।’

दुई समुदायबीचको विवादले उग्र रूप लिँदा सुरक्षाकर्मीले चलाएको गोली लागेर एक जनाको मृत्यु भएको छ । आइतबार राति भएको हिंसात्मक झडप नियन्त्रण बाहिर गएपछि जिल्ला प्रशासन कार्यालय सुनसरीले सोमबार बिहानदेखि दुई पालिकामा कर्फ्यु लगाएको छ । प्रमुख जिल्ला अधिकारी घिमिरेले बिहान ७ बजेदेखि लागु हुनेगरी हरिनगर गाउँपालिका र देवानगन्ज गाउँपालिकाको सम्पूर्ण क्षेत्रमा निषेधाज्ञा जारी गरेका हुन् । घटनापछि बसेको जिल्ला सुरक्षा समितिको बैठकको निर्णयअनुसार सोमबार साँझ ७ बजेसम्म निषेधाज्ञा जारी गरिएको प्रजिअ घिमिरेले सूचना जारी गरी जानकारी दिए । निषेधाज्ञा अवधिभर एकै ठाउँमा ५ जनाभन्दा बढी मानिस भेला हुन पाइने छैन । निषेधाज्ञा उल्लंघन भए ५०० रूपैयाँ जरिवाना र एक महिनासम्म कैद सजाय हुन सक्ने पनि प्रजिअ घिमिरेले जारी गरेको आदेशमा उल्लेख छ ।