देवघाटधाममा प्रदीप्त ज्ञानदीप: महेश गुरुकुलमा अन्तर्राष्ट्रिय रामानन्दप्रज्ञा-शास्त्रार्थसभा

-डा. उमेशप्रसाद घिमिरे

नेपालका तीर्थहरूमध्ये देवघाटधाम केवल धार्मिक आस्थाको केन्द्रमात्र होइन, वैदिक संस्कृति, गुरुशिष्य परम्परा, तपस्या र शास्त्रीय चिन्तनको अमर तीर्थ पनि हो । त्रिशूली, कालीगण्डकी र नारायणीको पावन सङ्गमले अभिषिक्त यस भूमिमा शताब्दीयौँदेखि ऋषि, मुनि, संन्यासी र दार्शनिकहरूले ज्ञानको दीप प्रज्वलित गर्दै आएका छन् । यहाँ नदीहरू मात्र प्रवाहित छैनन्; यहाँ त वैदिक सभ्यता, आध्यात्मिक चेतना र सनातन ज्ञानपरम्पराको अविरल प्रवाह निरन्तर गतिशील छ ।