प्रविधिको विकास र एआईले इतिहास संरक्षणमा चुनौती थपेको इतिहासविद् पोखरेलको भनाइ

काठमाडौँ । इतिहासविद् राजकुमार पोखरेलले बढ्दो प्रविधिको प्रयोग र आर्टिफिसियल इन्टेलिजेन्स (एआई) का कारण इतिहासको संरक्षण र ऐतिहासिक सामग्री संकलनमा ठूलो चुनौती थपिएको बताएका छन्।

सोमबार राष्ट्रिय सभाको सार्वजनिक नीति तथा प्रत्यायोजित विधायन समितिको बैठकमा बोल्दै इतिहासविद् पोखरेलले डिजिटल माध्यममा प्रसारित अप्रमाणित ऐतिहासिक सामग्रीहरूको नकारात्मक प्रभावलाई न्यूनीकरण गर्न कानुनी सुधारको टड्कारो आवश्यकता रहेको औँल्याएका हुन्। एआईको यो युगमा सही र गलत इतिहास छुट्याउन अत्यन्त कठिन भएको बताउँदै उनले युट्युब वा अन्य डिजिटल माध्यममा आउने सबै सामग्रीहरू सत्य नहुने र तिनको आन्तरिक तथा बाह्य परीक्षण गर्नुपर्नेमा जोड दिए।