कांग्रेसमा व्यापक आत्मसमीक्षा र रूपान्तरण जरुरी

भर्खरै बीपी कोइराला स्मृति दिवस मनाइएको छ । यो दिवस नेपाली कांग्रेसका लागि आफ्ना संस्थापक नेताको सम्झना गर्ने दिन मात्र होइन। यो पार्टीले आफूलाई ऐनामा हेर्ने, विगतका उपलब्धि र कमजोरीको निर्मम समीक्षा गर्ने तथा भविष्यको बाटो तय गर्ने अवसर पनि हो। बीपीले देखाएको लोकतन्त्र, राष्ट्रियता, समाजवाद, सहिष्णुता, संवाद र राष्ट्रिय एकताको मार्गलाई सम्झने हो भने आज कांग्रेसभित्र सबैभन्दा पहिले आवश्यक कुरा हो, आत्मसमीक्षा, सहमति, सहकार्य र एकता।

नेपाली कांग्रेसका पाका र अनुभवी नेताहरूप्रति एउटा आग्रह छ, बीपी स्मृति दिवसलाई नेतृत्वमाथि आरोप लगाउने वा आफ्नै पार्टीका सहकर्मीलाई गाली गर्ने अवसर नबनाऔँ। आफ्नै नेतृत्वप्रति कटु शब्द र आरोप प्रत्यारोपले क्षणिक राजनीतिक सन्तुष्टि त दिन सक्छ, तर त्यसले सङ्गठनभित्र विश्वास, एकता र सहकार्यको वातावरण निर्माण गर्दैन।