फरार ९७ कैदीबन्दी अझै सम्पर्कविहीन

चितवन। कारागार कार्यालय भरतपुरबाट गत भदौमा भएको जेन-जी प्रदर्शनका क्रममा भागेका कैदीबन्दीमध्ये ९७ जना अझै फर्किएका छैनन्। नौ भारतीयसहित ९७ कैदीबन्दी अझै सम्पर्कमा नआएको कारागार प्रशासनले जनाएको छ।

यस कारागारबाट गत २५ भदौमा ७३९ कैदीबन्दी भागेका थिए। तीमध्ये ६४१ जना फर्किएका छन्। एक जनाको भने परिवारको सम्पर्कमा पुगेपछि मृत्यु भएको कार्यालयका निमित्त प्रमुख चेतनाथ ढुंगानाले जानकारी दिए। उनका अनुसार तत्कालीन समयमा चार नाबालकसहित ७४३ कैदी भागेकामा नाबालकलाई कैदीबन्दीको सूचीमा नराखिने भएकाले ७३९ को विवरण मात्र उल्लेख गरिएको हो।