मेरो दाबी मुख्यमन्त्रीमा थियो, मन्त्रीमा छैन : श्रेष्ठ

काठमाडौँ । नेपाली कम्युनिस्ट पार्टी (नेकपा) का नेता गंगानारायण श्रेष्ठले आफू मन्त्री बन्न नेताहरूको ढोका चाहार्दै हिँडेको आरोप लगाउनेलाई कडा जवाफ फर्काएका छन् । पार्टीभित्रकै केही नेताले भ्रम फैलाउने कार्य गरेको आरोप लगाउँदै उनले आफू बागमती प्रदेशको मुख्यमन्त्रीको दाबेदारचाहिँ रहेको जवाफ फर्काएका हुन् ।

तर एमालेसँग सत्ता बाँडफाँटको सहमति हुँदा बागमती प्रदेशमा मुख्यमन्त्री एमालेको भागमै परेको सन्दर्भमा सोमबार सामाजिक सञ्जाल फेसबुकमार्फत धारणा सार्वजनिक गर्दै श्रेष्ठले केही व्यक्तिले अहिले फेरि आफू एक मन्त्री पदका लागि नेताहरूको ढोका–ढोका धाइरहेको भन्दै चरित्रहत्या गर्न खोजेको आरोप लगाएका हुन् ।