दुना–टपरी व्यवसायले बदलिँदै महिलाको जीवन

दाङको घोराही उपमहानगरपालिका–१६ रातामाटा टोलका महिलाले दुना–टपरी उद्योग सञ्चालन गरी आम्दानी गर्दै आएका छन् । सालका पातबाट दुना–टपरी बनाएर महिनामा १३ हजार रुपियाँसम्म आम्दानी गर्दै आएका हुन् ।

घरको काम सकेर फुर्सदको समयमा सदुपयोग गर्दै दुना–टपरी उद्योग सञ्चालन गरेका महिलाका लागि अहिले घरव्यवहार चलाउने भरपर्दो माध्यम बनेको छ । सानै उमेरदेखि घरमा दुना–टपरी बनाउने काम गर्दै आउनुभएकी रातामाटा टोल निवासी शान्ति चौधरीले उद्योगबाटै महिनामा १० देखि १२ हजारसम्म कमाउने गरेको बताउनुहुन्छ ।