रसुवा बाढीमा बेपत्ता भएकाको आफन्त भन्छन्– सास नभेटिए कम्तीमा लाससम्म भेटियोस्

विराटनगर। रसुवाको भोटेकोशी किनारमा आएको भीषण बाढी र पहिरोपछि बेपत्ता भएकाहरूको परिवार यतिबेला गहिरो चिन्ता र आशाका बिच बाँचिरहेका छन् । कोही आफ्ना मान्छे सकुशल भेटिएको खबरले राहतको सास फेरिरहेका छन् भने कोही लगातारको खोजीपछि पनि खबर नपाउँदा निराशाका बिच भौँतारिइरहेका छन् ।

विराटनगर–१ का दुर्गाप्रसाद पोखरेल टिमुरेस्थित अध्यागमन कार्यालयमा कार्यरत थिए । उनी पनि बाढी आएको दिनदेखि नै बेपत्ता छन् । काठमाडौँमा रहेका उनका दाजु प्रेम पोखरेलले भाइ सकुशल भेटिने आशा लगभग मारिसकेका छन् । ‘माटोमुनि दबिएको छ कि ! भेटिएको छैन । मान्छे बाँचेको छ भन्ने त मलाई विश्वासै छैन । किनभने टिमुरे अध्यागमनको कोठाभित्र बसेर काम गरिरहेको मान्छे, एक्कासि झ्याप्पै हान्यो । आँगनमा कुदेका मान्छे त बगेका छन्, कोठाभित्रका कसरी बच्लान्,’ दुर्गाप्रसादले भने ।