युरोपमा अमेरिकी सैन्य उपस्थितिको समीक्षा सुरु

संयुक्त राज्य अमेरिकाले युरोपमा आफ्नो सैन्य उपस्थितिको औपचारिक समीक्षा प्रक्रिया सुरु गरेको छ । वासिङ्टनले नाटोका युरोपेली सदस्य राष्ट्रहरूले महादेशको परम्परागत सुरक्षाको जिम्मेवारी थप प्रभावकारी रूपमा वहन गर्नुपर्ने नीति अघि बढाइरहेका बेला यो कदम चालिएको हो ।

अमेरिकी रक्षा उपमन्त्री एल्ब्रिज कोल्बीले सामाजिक सञ्जाल एक्समार्फत रक्षामन्त्री पीट हेग्सेथले यसअघि घोषणा गर्नुभएको योजनाअनुसार समीक्षा सुरु भएको जानकारी दिनुभएको छ । उहाँका अनुसार यो समीक्षा युरोपले आफ्नो परम्परागत सुरक्षाको प्रमुख जिम्मेवारी क्रमिक र अपरिवर्तनीय रूपमा ग्रहण गरिरहेको सुनिश्चित गर्न केन्द्रित रहनेछ ।