२४ वर्षमा पनि सकिएन कमेरोटार जग्गा एकीकरण आयोजना

भक्तपुर : शहरीकरणलाई व्यवस्थित बनाउने उद्देश्यले भक्तपुरको मध्यपुर थिमि नगरपालिका क्षेत्रमा सुरु गरिएको कमेरोटार जग्गा एकीकरण आयोजना सुरु भएको करिब २४ वर्ष बितिसक्दा पनि अझै पूर्ण हुन सकेको छैन । आयोजना लामो समयसम्म अधुरै रहँदा स्थानीय जग्गाधनी तथा सर्वसाधारणले सडक, ढल, खानेपानीलगायत आधारभूत पूर्वाधारको सुविधा पूर्ण रूपमा पाउन सकेका छैनन् ।

आयोजनासम्बन्धी संक्षिप्त जानकारी दिन आयोजनाको कार्यालयले सोमबार भक्तपुरमा गरेको पत्रकार सम्मेलनमा दिइएको जानकारी अनुसार आयोजनाको काम अझै बांँकी नै छ । मध्यपुर थिमि नगरपालिका र काठमाडौं उपत्यका विकास प्राधिकरणअन्तर्गत जिल्ला आयोजना कार्यान्वयन कार्यालय भक्तपुरद्वारा सञ्चालित आयोजनाको ९० प्रतिशत काम सकेको पत्रकार सम्मेलनमा जनायो ।