टेन्डरमा च्याखे थाप्ने युवाद्वारा गुलरियामा लगातार सांघातिक आक्रमण

सामुदायिक वनले निकालेको टेन्डरमा च्याखे थाप्ने युवाको समूहले लगातार सांघातिक हमला गर्न थालेपछि गुलरिया बजार क्षेत्र त्रसित बनेको छ। सामुदायिक वनको टेन्डर सम्झौतामा बोलकबोल गर्न दबाब सिर्जना गर्ने उद्देश्यले सक्रिय युवाहरूले पछिल्लो समय सांघातिक आक्रमण गर्न थालेको आरोप लागेको छ।

डिभिजन वन कार्यालयका इन्जिनियर शुभ यादवलाई कार्यालय अगाडि सोमबार राति धारिलो हतियार प्रयोग गरी युवाको समूहले टाउकोमा सांघातिक आक्रमण गरेको छ। घटनापछि कार्यालयका कर्मचारीहरूले इन्जिनियर यादवलाई तत्काल बर्दिया अस्पताल पुर्‍याएका थिए। टाउकोमा सात वटा टाँका लगाएपछि घाइते यादव कार्यालय फर्किएका छन्।