थुप्रिँदै गैरबैंकिङ सम्पत्ति

ऋणीले राखेको घरजग्गालगायत धितो बिक्री नभएर बैंकहरूलाई कर्जा उठाउन सास्ती भइरहेको छ। अहिले बैंकका कर्मचारी कर्जा चुक्ताका लागि ऋणीको घर–कार्यालयमै पुगेर ताकेता गर्दा पनि उनीहरूले अनेक समस्या देखाएर तिर्ने भाका लम्ब्याइरहेको गुनासो बैंकरहरूको छ। कर्जा उठाउन गएका बैंकका कर्मचारीसमेत पिटिएका घटना बाहिरिएपछि सुरक्षामा पनि चुनौती बढेको छ।

ऋणीले तोकिएको म्यादमा ऋण नतिरेपछि धितोबापत राखेको सम्पत्ति जफत गर्न पटकपटक कर्जा चुक्ताको सूचना पत्रपत्रिकामा निकाल्नेदेखि अनेक प्रयास गर्दा समेत असुल हुन सकेको छैन। खराब कर्जा व्यवस्थापन अर्थात् ऋणीले राखेको धितो बिक्री नहुँदा बैंकहरूमा गैरबैंकिङ सम्पत्ति थुप्रिएको छ। बैंकिङ क्षेत्रमा खराब कर्जा व्यवस्थापन निकै चुनौतीपूर्ण बनेको बैंकरहरू बताउँछन्।