बाघ बढेसँगै बाँकेमा जंगल सफारीको आकर्षण चुलियो

नेपालगञ्ज । बाँके राष्ट्रिय निकुञ्जमा बाघको संख्या उल्लेख्य रूपमा बढेपछि यस क्षेत्रको पर्यटन सम्भावना थप उजागर भएको छ। राष्ट्रिय बाघ सर्वेक्षण २०८२ अनुसार निकुञ्जमा बाघको संख्या २५ बाट बढेर ५१ पुगेको छ, जसले बाँकेलाई वन्यजन्तु अवलोकनका लागि आकर्षक गन्तव्यका रूपमा स्थापित गर्न मद्दत पुग्ने अपेक्षा गरिएको छ।

निकुञ्ज प्रशासनका अनुसार बाघको संख्या वृद्धि संरक्षण प्रयासको सफलतामात्र नभई प्रकृतिमा आधारित पर्यटन विस्तारको अवसर पनि हो। बाघसँगै हात्ती, चित्तल, नीलगाई, विभिन्न चराचुरुङ्गी तथा अन्य वन्यजन्तुको सहज अवलोकन गर्न सकिने भएकाले आन्तरिक तथा बाह्य पर्यटक आकर्षित हुने विश्वास गरिएको छ।