बाढी र पहिरोका कारण अवरुद्ध छन् यी राजमार्ग

काठमाडौँ । नेपाल प्रहरीले देशका विभिन्न मुख्य राजमार्गहरू बाढी र पहिरोका कारण अवरुद्ध भएको जानकारी दिएको छ। प्रहरीका अनुसार ललितपुरको बागमती गाउँपालिकास्थित कान्तिलोकपथ साउन १२ गतेदेखि नै पहिरोका कारण पूर्ण रूपमा अवरुद्ध छ।

यस्तै, सिन्धुपाल्चोकको भोटेकोशी गाउँपालिकाका विभिन्न स्थानमा पहिरो जाँदा अरनिको राजमार्ग पनि पूर्ण रूपमा ठप्प भएको छ। दोलखाको लामासाँघु-रामेछाप सडक र रसुवाको त्रिशूली-मैलुङ-स्याफ्रुबेसी सडक खण्ड पनि बाढीका कारण पूर्ण रूपमा अवरुद्ध रहेका छन्, यद्यपि दोलखामा वैकल्पिक बाटोमार्फत यातायात सञ्चालनको प्रयास गरिएको छ।