जनकपुरका सडक अतिक्रमण हटाउन ३५ दिने अल्टिमेटम

जनकपुरधाम । सडक डिभिजन कार्यालय जनकपुरले आफ्नो कार्यक्षेत्रभित्र पर्ने दुई प्रमुख सडकखण्डमा भएका अतिक्रमण हटाउन ३५ दिनको समयसीमा दिएको छ। कार्यालयले सार्वजनिक सूचना जारी गर्दै तोकिएको अवधिभित्र सडक क्षेत्र खाली नगरे कानुनबमोजिम डोजर चलाएर अतिक्रमित संरचना हटाइने चेतावनी दिएको हो।

सडक डिभिजन जनकपुरले साउन १४ गते जारी गरेको सूचनाअनुसार माइस्थान–गौशाला–सम्सी सडक (चेन ०+००० देखि २६+९४०) तथा बर्दिबास–जलेश्वर सडक (चेन ०+००० देखि ४२+०००) खण्डमा सार्वजनिक सडक ऐन, २०३१ विपरीत विभिन्न प्रकारका अतिक्रमण भएको पाइएको जनाएको छ।