वीर अस्पतालको आवाज सरकारको मौनता

वीर अस्पताल केवल एउटा सरकारी अस्पताल होइन, नेपालको आधुनिक स्वास्थ्य सेवाको इतिहास, चिकित्सा शिक्षाको जग र लाखौं नागरिकको अन्तिम भरोसाको केन्द्र हो । १३७ वर्षको गौरवशाली इतिहास बोकेको यो अस्पतालले मुलुकका गरिब, विपन्न र जटिल बिरामीलाई निरन्तर सेवा दिइरहेको छ । यस्तो राष्ट्रिय गौरवको संस्थाको स्थापना दिवसमा सरकारकै अनुपस्थिति भने केवल प्रोटोकलको कमजोरी होइन, सरकारी स्वास्थ्य प्रणालीप्रतिको दृष्टिकोणमाथि गम्भीर प्रश्न उठाउने विषय बनेको छ ।

स्वास्थ्यमन्त्री प्रमुख अतिथिका रूपमा आउने कार्यक्रम तय भएको थियो । स्वास्थ्य मन्त्रालयका सचिवको समेत सहभागिता अपेक्षित थियो । तर अन्तिम समयमा न मन्त्री आए, न सचिव । अझ देशभरका स्वास्थ्य प्रतिष्ठानका उपकुलपतिहरूलाई निमन्त्रणा गरिए पनि दुईजनाबाहेक अरू उपस्थित भएनन् । यो संयोग मात्र हो कि सरकारी स्वास्थ्य संस्थाप्रतिको क्रमशः बढ्दो बेवास्ताको संकेत ? यस्तो प्रश्न उठ्नु स्वाभाविक छ ।