ईसीडी शिक्षक र विद्यालय कर्मचारीको तलब वृद्धिबारे शिक्षामन्त्री भन्छन्- क्षमताले नभ्याएको कुरा कसरी गर्ने र!

काठमाडौँ- शिक्षा तथा खेलकुदमन्त्री सस्मित पोखरेलले सामुदायिक विद्यालयका प्रारम्भिक बालविकास सहजकर्ता (ईसीडी शिक्षक) र विद्यालय कर्मचारीको तलब वृद्धिका विषयमा सरकार संवेदनशील रहे पनि मुलुकको आर्थिक अवस्थाका कारण तत्काल अपेक्षाअनुसार निर्णय गर्न कठिन रहेको बताएका छन्।

सिंहदरबारस्थित शिक्षा तथा खेलकुद मन्त्रालयमा बुधबार सामुदायिक विद्यालयका प्रधानाध्यापकसँग विद्यालय शिक्षाका समसामयिक विषयमा आयोजित अन्तरक्रिया कार्यक्रममा मन्त्री पोखरेलले ईसीडी शिक्षक, लेखापाल तथा विद्यालय सहयोगीका लागि उपलब्ध गराइने अनुदान वृद्धि गर्न अर्थ मन्त्रालयसँग विभिन्न चरणमा छलफल भइरहेको जानकारी दिए।