कर्णालीका जीर्ण सडकहरूमा रोकिएन दुर्घटना

मनसुन सक्रिय भएसँगै कर्णाली प्रदेशका अधिकांश सडकमा पहिरो, बाढीका कारण आवागमन थप जोखिमपूर्ण बनेको छ। भौगोलिक रूपमा विकट रहेको प्रदेशमा सुरक्षित सडक पूर्वाधार अभाव, जीर्ण सडक र सवारी साधनको प्राविधिक कमजोरीका कारण वर्षा याममा यात्रा झन् कठिन हुने गरेको स्थानीय बताउँछन्।

सुर्खेतबाट कालीकोटको रास्कोट जाँदै गरेको कर्णाली प्रदेश–०२–००१ ख १०५५ नम्बरको फोर्स गाडी गत असार १८ मा दैलेखको चामुण्डाविन्द्रासैनी नगरपालिका– ७ सांगेतडास्थित कर्णाली नदीमा खस्यो। दुर्घटनामा परी एकजना घटनास्थलमै मृत भेटिए भने कैलालीको चिसापानी आसपास कर्णाली नदी किनारमा दुई पुरुष र एक महिलाको शव भेटियो। गाडीमा कतिजना थिए भन्नेबारे अझै यकिन भएको छैन भने दुर्घटना भएको गाडी हालसम्म पनि भेटिएको छैन।