कर्णालीका मन्त्रीको मनपरी : भौतिकले नमानेपछि निर्वाचन क्षेत्रमा आफ्नै मन्त्रालयबाट ५ करोडको योजना

सुर्खेत । कर्णाली प्रदेशका सामाजिक विकासमन्त्री घनश्याम भण्डारीले आफूखुसी आफ्नो निर्वाचन क्षेत्रमा ५ करोड रुपैयाँ बजेट विनियोजन गरेको पाइएको छ। प्रदेश सरकारसँग हुँदै नभएको ‘सुरक्षित नागरिक आवास’ नामको कार्यक्रम खडा गरी उनले आफ्नै मन्त्रालयबाट दुईवटा योजना पारेका हुन्।

आगामी आर्थिक वर्ष (२०८३/०८४) को मन्त्रालयगत बजेट शीर्षकअन्तर्गत सामाजिक विकास मन्त्रालयको कार्यक्रम पुस्तिकामा दैलेखको भैरवी गाउँपालिका वडा नम्बर १ देखि ७ सम्मका लागि भनेर दुई करोड रुपैयाँ विनियोजन गरिएको छ। यस्तै, दुल्लू नगरपालिका वडा नम्बर १ देखि १३ सम्मका लागि भनेर तीन करोड रुपैयाँ विनियोजन गरिएको छ।