डिभोर्सको कागज च्यात्दै श्रीमतीले गरिन् श्रीमानलाई अँगालो, अदालत बन्यो भावुक

कानुनी लडाइँ, बहस र आरोप–प्रत्यारोप चल्ने दिल्लीको एउटा अदालतको कोठामा भर्खरै एउटा यस्तो दृश्य देखियो, जसले त्यहाँ उपस्थित न्यायाधीश, वकिल र अन्य सबैलाई भावुक बनायो। विगत पाँच वर्षदेखि अदालतमा चलिरहेको एउटा सम्बन्ध विच्छेदको मुद्दा क्षणभरमै एउटा आत्मीय मिलनमा परिणत भयो, जब श्रीमती शिक्खा सिंहले डिभोर्सका कागजात च्यातेर आफ्ना श्रीमान सौरभलाई रुँदै अँगालो हालिन्।

सन् २०२० मा विवाह बन्धनमा बाँधिएका शिक्खा र सौरभको वैवाहिक जीवन सुरुवाती दिनदेखि नै सहज हुन सकेन। आपसी असमझदारी र मनमुटाव बढ्दै गएपछि शिक्खाले दाइजोसम्बन्धी मुद्दा दायर गर्दै सम्बन्ध विच्छेदको माग गरिन्। विगत पाँच वर्षदेखि दुवै पक्ष न्यायका लागि अदालत धाइरहेका थिए। यो लामो कानुनी लडाइँले दुवै परिवारलाई मानसिक र आर्थिक रूपमा निकै कमजोर बनाएको थियो। विशेष गरी शिक्खाका बुबा छोरीको बिग्रिएको भविष्य र कानुनी खर्चको चिन्ताले निकै ग्रस्त थिए।