अब बोल्ने बेला भएन बालेन सरकार!

नेपालको लोकतन्त्रले धेरै संकटहरू देखेको छ। राजनीतिक आन्दोलन, संविधान निर्माण, राजतन्त्रको अन्त्य, सशस्त्र द्वन्द्व र प्राकृतिक विपद्सम्मका चुनौतीहरू पार गरेको राज्य आज फेरि अर्को संवेदनशील मोडमा उभिएको छ। तर यसपटकको चुनौती केवल सुरक्षा व्यवस्थापनको मात्र होइन, सामाजिक सद्भाव जोगाउने क्षमता र राजनीतिक नेतृत्वको जिम्मेवारीसँग पनि जोडिएको छ।

सुनसरीको देवानगञ्ज गाउँपालिका–३ कप्तानगञ्जमा भएको घटनाबाट सुरु भएको विवादले केही दिनमै गम्भीर रूप लिइसकेको छ। घाइते २१ वर्षीय जयप्रकाश मेहताको उपचारका क्रममा मृत्यु भएसँगै देवानगञ्ज घटनामा ज्यान गुमाउनेको संख्या दुई पुगेको छ। त्यसको प्रभाव मधेसका विभिन्न जिल्लासम्म फैलिँदा सिरहाको गोलबजारमा कर्फ्युकै बीच गोली चल्यो र गणेश यादवको पनि मृत्यु भयो। यससँगै विवादले तीन जनाको ज्यान लिइसकेको छ।