४ वटा आँपको मूल्य साढे ३ लाख रुपैयाँ मियाजाकी आँपले बनायो कीर्तिमान

भारतकाे उत्तर प्रदेशको सहारनपुरका किसान सन्दीप चौधरीले उत्पादन गरेको विश्वकै महँगो मानिने जापानी ‘मियाजाकी’ प्रजातिको आँप भारतमा रेकर्ड मूल्यमा बिक्री भएको छ। गुजरातको सुरतका व्यापारी प्रवीण गुप्ताले करिब १ किलो तौल भएका ४ वटा मियाजाकी आँप २ लाख ११ हजार भारतीय रुपैयाँ (करिब ३ लाख ३७ हजार नेपाली रुपैयाँ) मा खरिद गरेका हुन्।

भारतीय सञ्चारमाध्यमका अनुसार सुरुमा ती आँपको मूल्य ३ लाख ५० हजार भारतीय रुपैयाँ निर्धारण गरिएको थियो। तर व्यापारी गुप्ताले आफ्नी आमाको सम्मानमा ती आँप खरिद गर्न लागेको जानकारी पाएपछि किसान चौधरीले १ लाख ३९ हजार रुपैयाँ छुट दिँदै २ लाख ११ हजार रुपैयाँमै बिक्री गर्न सहमति जनाएका हुन्। हालसम्म १ लाख ११ हजार रुपैयाँ अनलाइनमार्फत भुक्तानी भइसकेको छ भने बाँकी रकम आँप हस्तान्तरणका क्रममा बुझाइने बताइएको छ।