शुक्रबार विराटनगरमा सद्‍भाव र्‍याली निकालिने

सुनसरीको देवानगञ्जमा भएको घटनापछि उत्पन्न परिस्थितिलाई मध्यनजर गर्दै मोरङमा बसेको सर्वपक्षीय सद्भाव बैठकले धार्मिक तथा सामाजिक सद्भाव कायम राख्न सबै पक्षलाई संयमता अपनाउन आग्रह गरेको छ। बैठकले जिल्लामा शान्ति, सुरक्षा र सामुदायिक एकता कायम राख्न साझा प्रतिबद्धता पनि व्यक्त गरेको छ।

प्रमुख जिल्ला अधिकारी युवराज कट्टेलको आह्वानमा बसेको बैठकले घटनामा ज्यान गुमाएकाप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेको छ। साथै, विराटनगरका विभिन्न अस्पतालमा उपचाररत घाइतेको उपचार प्रभावकारी बनाउन आवश्यक समन्वय गर्ने निर्णय पनि गरिएको छ।