राष्ट्रिय हित र शान्ति स्थापनाका लागि सबै एकजुट हौँ - केपी शर्मा ओली

नेकपा एमालेका अध्यक्ष केपी शर्मा ओलीले सुनसरीको देवानगञ्ज गाउँपालिकामा केही दिनयता उत्पन्न तनावपूर्ण परिस्थितिमा राज्य पक्षबाट भएको बल प्रयोगप्रति गम्भीर आपत्ति जनाएका छन् । एक विज्ञप्ति जारी गर्दै उनले अमानवीय घटनाहरू रोकिनुको साटो थप उग्र बन्दै गएको उल्लेख गरेका छन् ।

देश जटिल र संवेदनशील घडीमा रहेको औंल्याउँदै उनले नागरिक, राजनीतिक दल र सरोकारवालाहरूलाई चार बुँदे अपिल जारी गरेका छन् । जनतालाई आपसमा विभाजित गरेर अवाञ्छित उद्देश्य पूरा गर्ने षड्यन्त्रप्रति सचेत गराउँदै उनले सामाजिक सद्भाव र एकता जोगाउन सबैलाई सक्रिय हुन आग्रह गरेका छन् । साथै, नागरिकको जीउधनको रक्षा गर्ने र संवादको माध्यमबाट समस्या समाधान गरी शान्ति कायम गर्ने मुख्य दायित्वबाट सरकार मौन बसेको भन्दै उनले सरकारमाथि प्रश्नसमेत उठाएका छन् ।