सरकारी निकायमा सेवा–संस्कारको खाँचो

सरकारी सेवा प्रदायक कार्यालय, संस्था र निकाय नागरिकका लागि स्थापना गरिएका हुन् । राज्यले नागरिकलाई सहज, छिटो र सम्मानजनक सेवा उपलब्ध गराओस् भन्ने उद्देश्यले ती संरचना निर्माण गरिएका हुन् । तर विडम्बना, धेरै नागरिकका लागि सरकारी कार्यालय भने सेवा पाउने ठाउँभन्दा झर्कोफर्को, अपमान र अनावश्यक हैरानी भोग्ने स्थलका रूपमा चिनिएका छन् ।

राज्यको अनुहार नागरिकले सबैभन्दा पहिले सरकारी कार्यालयमै देख्छ । नागरिकता बनाउन जाँदा, राहदानी लिन, मालपोतको काम गर्न, कर तिर्न, अस्पतालमा उपचार गराउन वा स्थानीय तहबाट कुनै सिफारिस लिन जाँदा नागरिकको प्रत्यक्ष भेट सरकारी कर्मचारीसँग हुन्छ । यही भेटले राज्यप्रतिको नागरिकको विश्वास निर्माण पनि गर्छ र भत्काउँछ पनि । दुर्भाग्यवश, नेपालका धेरै सेवा प्रदायक सरकारी कार्यालयमा अझै पनि सेवाभन्दा आदेश, सहयोगभन्दा झर्कोफर्के र जिम्मेवारीभन्दा अहंकार बढी देखिने गरेको गुनासो पुरानै हो ।