मेरो गाउँ: जहाँ हिन्दु र मुस्लिम सँगै मुस्कुराउँछन्

आज देशका विभिन्न कुनाबाट जातीय र धार्मिक तनावका समाचारहरू आइरहेका छन्। कतै आस्थाका नाममा विभाजन छ, कतै जातका नाममा द्वन्द्व। यस्ता खबरहरू पढ्दा मन भारी हुन्छ। अनि अनायासै सम्झनामा आउँछ, मेरो जन्मगाउँ, बाजुराको बुढीनन्दा नगरपालिका–कोटिला।

त्यो केवल एउटा गाउँ होइन, मेरो बाल्यकालको संसार हो। जहाँ मानिसलाई धर्मले होइन, व्यवहारले चिनिन्थ्यो। जहाँ सम्बन्धको आधार जात होइन, आत्मीयता थियो। जहाँ हामीले मानवताको पाठ कुनै किताबबाट होइन, गाउँको जीवनबाट सिक्यौँ।