ब्रोड पिक हिमपहिरो : युक्त र नाधिराको शव स्कर्दु ल्याइँदै, निर्मल पुर्जासहित ६ को खोजी जारी

पाकिस्तानको काराकोरम पर्वत शृङ्खलास्थित विश्वकै १२ औँ अग्लो हिमाल ब्रोड पिक (८ हजार ४७ मिटर) मा गएको भीषण हिमपहिरोमा परी बेपत्ता भएकामध्ये चार जनाको शव फेला परेको छ।

पाकिस्तानी सेनाको सञ्चार शाखा (आईएसपीआर), अल्पाइन क्लब अफ पाकिस्तान (एसीपी) र गिलगिट-बाल्टिस्तान प्रहरीका अनुसार १० सदस्यीय अन्तर्राष्ट्रिय आरोही टोलीमध्ये चार जनाको शव निकालिएको छ भने बाँकी ६ जना अझै बेपत्ता छन्। एसीपीका अध्यक्ष मेजर जनरल इरफान अरशद खानले मृतकमध्ये ओमानकी प्रसिद्ध पर्वतारोही नाधिरा अहमद अब्दुल्लाह अल हार्थी र नेपालका पुरबहादुर गुरुङ (युक्त) को पहिचान खुलेको जानकारी दिएका छन्।