रु. २५० मा खल्तीको ब्लुबुक नवीकरण सेवा सुरु, एउटा मिस्ड कलमै घरदैलोमा सेवा दिने

काठमाडौं । डिजिटल वालेट खल्तीले कानुनी अस्पष्टताका कारण केही समय रोकिएको आफ्नो ‘ब्लुबुक नवीकरण’ सेवालाई पुनः निरन्तरता दिएको छ । सरकारी कार्यालयहरूमा बिचौलिया निषेध गर्ने प्रहरीको अभियान र त्यसले निम्त्याएको अन्योलका कारण चैतको अन्तिम हप्तातिर स्थगित भएको यो सेवा अहिले चलिरहेको कम्पनीका प्रमुख कार्यकारी अधिकृत (सीईओ) प्रवीन रेग्मीले जानकारी दिए ।

सेवाग्राहीले ट्राफिक जाम, झरी वा यातायात कार्यालयको लामो लाइनमा बस्ने झन्झट नगरी घरैबाट सुरक्षित र कानुनी रूपमा ब्लुबुक नवीकरण गर्न सक्ने कम्पनीको भनाइ छ । खल्ती सुरक्षाकी एक प्रतिनिधिले यो सेवा जेठ महिनादेखि नै आंशिक रूपमा सुरु भएको र अहिले पूर्ण सक्रिय रहेको जानकारी दिइन् ।