कर उठाउन मुद्दा फिर्ताको नीति

स्वस्तिक आयल इन्डस्ट्रिज प्रालिले आयकर नतिरेको विवादमा ठूला करदाता कार्यालयविरुद्ध दर्ता गरेको मुद्दा ९ असारमा सर्वोच्च अदालतको दैनिक पेसी सूचीमा चढेको थियो। तर, कम्पनीले कानुन व्यवसायीका तर्फबाट स्थगनका लागि निवेदन दियो। आर्थिक वर्ष २०७७/७८ र २०७८/७९ मा देखिएको कम्पनीको आयकरसम्बन्धी विवादको मुद्दा राजस्व न्यायाधिकरण हुँदै सर्वोच्च अदालत पुगेको हो।

स्वस्तिक आयलको मात्रै होइन, सोही दिन सुनुवाइका लागि पेसी चढेको सौरभ फुड प्रोडक्सनको आयकरसम्बन्धी विवादको मुद्दा, आरएमसी सिमेन्टको मूल्य अभिवृद्धि कर (भ्याट)को मुद्दा पनि स्थगन गर्न माग गरियो। आन्तरिक राजस्व विभागविरुद्ध दर्ता गरेका र सरकार आफैँले दर्ता गरेका मुद्दामा पनि सुनुवाइ स्थगित गराइएको थियो। ९ असारमा सर्वोच्चको पेसीमा रहेका ७१६ थान मुद्दामध्ये ३२९ मुद्दामा स्थगितका लागि निवेदन दिइएका थिए। तीमध्ये धेरै मुद्दा आयकर, राजस्व छली र भ्याटसँग सम्बन्धित थिए।