कप्तानगन्ज गोलीकाण्डका दुवै मृतकको शव परिवारलाई हस्तान्तरण

विराटनगर : सुनसरीको देवानगन्ज गाउँपालिका–३ कप्तानगन्जमा भएको गोलीकाण्डमा ज्यान गुमाएका दुई युवाको शव पोस्टमार्टमपछि शुक्रबार परिवारलाई हस्तान्तरण गरिएको छ। आवश्यक कानुनी प्रक्रिया पूरा गरेर शव जिम्मा लगाएपछि परिवारले बुझेर अन्त्येष्टिका लागि लगेका छन्।

दुई पक्षबीच भएको विवाद उग्र बनेपछि अवस्था नियन्त्रणमा लिन सशस्त्र प्रहरीले गत आइतबार राति गोली चलाएको थियो। गोली लागेर देवानगन्ज–४ का २५ वर्षीय ओमप्रकाश मेहताको घटनाकै राति मृत्यु भएको थियो। त्यस्तै, गोली लागेर घाइते भएका देवानगन्ज–३ का २२ वर्षीय जयप्रकाश मेहताको उपचारका क्रममा विराटनगरस्थित न्युरो अस्पतालमा बिहीबार मृत्यु भएको थियो।