नेपाल-चीन सम्बन्ध : विश्वासमा आधारित मित्रता

लाग्छ, आज विश्व नयाँ मोडमा उभिएको छ। विश्वमा शक्ति सन्तुलन तीव्र रूपमा परिवर्तन भइरहेको छ। शीतयुद्धको दुई ध्रुवीय विश्वबाट बहुध्रुवीय विश्व व्यवस्थातर्फको मोड, आर्थिक विश्वव्यापीकरण, डिजिटल क्रान्ति, कोभिड-१९ महामारी, कृत्रिम बुद्धिमत्ता र नवप्रवर्तनको फड्को मार्ने विकास, जलवायु परिवर्तनको बढ्दो असर र थपिँदै गएका भूराजनीतिक प्रतिस्पर्धाले अन्तर्राष्ट्रिय सम्बन्धको स्वरूपलाई नै पुनःपरिभाषित गरिरहेको छ।

यही प्रक्रियामा, एसिया विश्व अर्थतन्त्रको केन्द्र बन्दै गएको छ। चीन विश्व कै प्रमुख आर्थिक शक्तिमध्ये एक बनेको छ। भारत पनि तीव्र आर्थिक वृद्धितर्फ अघि बढिरहेको छ। यसरी आर्थिक प्रतिस्पर्धा, प्रविधिको तीव्र विकास, आपूर्ति शृँखलाको पुनःसंरचना तथा अन्तर्राष्ट्रिय शक्ति सन्तुलनमा भइरहेका परिवर्तनले दक्षिण एसियाको रणनीतिक महत्त्व पनि बढाएको छ। अमेरिका, बेलायत, युरोपेली संघ, जापानलगायत अन्य शक्तिशाली राष्ट्रहरूले पनि नेपालसहित दक्षिण एसियामा आफ्नो सक्रियता बढाइरहेका छन्।