सामाजिक सद्भाव र धार्मिक सहिष्णुता कायम राख्न सुदूरपश्चिम प्रदेश सरकारको अपिल

सुदूरपश्चिम प्रदेश सरकारले सुनसरीको कप्तानगञ्ज घटनापछि उत्पन्न परिस्थितिलाई दृष्टिगत गर्दै सामाजिक सद्भाव, धार्मिक सहिष्णुता र शान्ति कायम राख्न सबैमा अपिल गरेको छ।

मुख्यमन्त्री कमलबहादुर शाहले आज एक अपिल जारी गर्दै नेपाल बहुजातीय, बहुभाषिक र बहुधार्मिक विशेषता बोकेको मुलुक भएकाले सामाजिक, सांस्कृतिक तथा धार्मिक उत्सवहरू मनाउँदा एकअर्काको भावना र शान्तिमा खलल नपुग्ने गरी मर्यादित व्यवहार गर्न आग्रह गरेका छन्। साथै सामाजिक सञ्जालमा अफवाह, घृणायुक्त अभिव्यक्ति वा भ्रामक सामग्री पोस्ट वा साझा गरेर समाजमा वैमनस्य फैलाउने कार्य नगर्न पनि अनुरोध गरेका छन्।