सुनसरी–सिरहापछि मधेसमा शान्ति पहल

सुनसरीको कप्तानगञ्ज र सिरहाको गोलबजारमा भएका हिंसात्मक घटनापछि पीडित परिवारसँग छुट्टाछुट्टै सहमति गरेका गृहमन्त्री सुधन गुरुङले शनिबार मधेस प्रदेशको समग्र शान्ति–सुरक्षा अवस्थाबारे प्रदेश सरकारसँग उच्चस्तरीय छलफल गरेका छन्।

सुनसरीको कप्तानगञ्जमा प्रहरीको गोली लागेर दुई जनाको मृत्यु भएपछि बिहीबार राति पीडित परिवारसँग सहमति गरेका गृहमन्त्री गुरुङ त्यसलगत्तै सिरहा पुगेका थिए। सिरहाको गोलबजारमा प्रदर्शनका क्रममा गोली लागेर ज्यान गुमाएका १५ वर्षीय गणेश यादवका परिवारसँग सातबुँदे सहमति गरेपछि उनी जनकपुरधाम पुगेका हुन्। त्यहाँ उनले हिन्दुवादी संगठनका प्रतिनिधिहरूसँग पनि छुट्टै वार्ता गरेका थिए।