पहिरोले संकटमा परेको विद्यालय जोगाउन श्रमदानमा जुटे गाउँले

सुनसरी : अविरल वर्षापछि गएको पहिरोले खोटाङको साकेला गाउँपालिका–१ डाँडागाउँस्थित सरस्वती आधारभूत विद्यालय जोखिममा परेपछि स्थानीय समुदाय आफैं संरक्षण अभियानमा जुटेको छ। विद्यालयको भत्किएको पर्खाल जोगाउन र थप क्षति रोक्न ‘साकेला श्रम अभियान’ अन्तर्गत श्रमदानमार्फत विद्यालय भवन जोगाउन रिटेनिङ वाल निर्माण सुरु गरिएको छ।

विद्यालय संरक्षणका लागि सञ्चालन गरिएको अभियानमा गाउँपालिका अध्यक्ष रवि प्रकाश राईको नेतृत्व तथा वडा १ का अध्यक्ष हेमन राईको संयोजनमा जनप्रतिनिधि, शिक्षक, अभिभावक र स्थानीयवासी गरी ७० जनाभन्दा बढीले सामूहिक श्रमदान गरेका छन्। पहिरोको जोखिम तत्काल न्यूनीकरण गर्दै विद्यालयलाई सुरक्षित बनाउने उद्देश्यले अभियान अघि बढाइएको हो।