उदयपुरमा लागूऔषधसहित दुई पक्राउ

उदयपुर प्रहरीले आइतबार साँझ लागूऔषधसहित दुई जनालाई नियन्त्रणमा लिएको छ। त्रियुगा नगरपालिका ६ लालपत्तास्थित उदयपुर र पप्तरीको सीमानाका लालपत्ता प्रहरी चौकीले चेकजाँचका क्रममा उनीहरूलाई पक्राउ गरेको हो।

लहानबाट गाईघाटतर्फ आउँदै गरेको स २ प ७८७ नम्बरको मोटरसाइकललाई नियमित चेकजाँचका क्रममा लागूऔषध बोकेको फेला परेपछि मोटरसाइकल चालक त्रियुगा नगरपालिका ५ का २१ वर्षीय दीपकराज पोखरेल र पछाडि सवार २५ वर्षीय पुरन मगर पक्राउ परेका हुन्। उनीहरूको साथबाट प्रतिबन्धित लागूऔषध ओपिडोल ४ सय ९० क्याप्सुल र स्पास्पेन ४ सय ९० क्याप्सुल गरी जम्मा ९ सय ८० क्याप्सुल बरामद भएको छ।