डेब्युमै गोल गर्दै चम्किए जोलिस, आर्सनलको शानदार जित

काठमाडौं। आर्सनलले प्रि–सिजनको पहिलो मैत्रीपूर्ण खेलमा स्पेनिस क्लब जिरोनालाई ४–१ ले पराजित गरेको छ। नयाँ अनुबन्धित ग्रीसका विंगर क्रिस्टोस जोलिसले डेब्युमै गोल गर्दै समर्थकलाई आफ्नो क्षमताको झल्को दिएका छन्।

बेल्जियमको क्लब ब्रुगबाट करिब ३४ मिलियन पाउन्डमा आर्सनल आएका जोलिसले टर्कीको क्लब बेसिक्टास पुगेका लिएन्ड्रो ट्रोसार्डको स्थान लिएका हुन्। खेलको १६औँ मिनेटमा १६ वर्षीय म्याक्स डोम्यानको उत्कृष्ट पासमा काइ हाभर्ट्जले गोल गर्दै आर्सनललाई अग्रता दिलाएका थिए।