वैदेशिक सहायता र लगानीमा कमजोर उपस्थिति

नेपालले आर्थिक वर्ष २०८२÷८३ मा वैदेशिक सहायता प्राप्तिमा लक्ष्यको आधाभन्दा पनि कम सफलता हासिल गरेको छ । २ खर्ब ८७ अर्ब रुपियाँभन्दा बढी वैदेशिक सहायता प्राप्त गर्ने लक्ष्य राखिएकोमा जम्मा १ खर्ब ३१ अर्ब रुपियाँ अर्थात् लक्ष्यको ४५.६६ प्रतिशत मात्रै प्राप्त भयो ।

ऋणतर्फ लक्ष्यको ४६.८५ प्रतिशत र अनुदानतर्फ ४०.४४ प्रतिशत मात्र प्राप्त हुनु सामान्य प्रशासनिक कमजोरीको विषय होइन, यो नेपालको विकास व्यवस्थापन र अन्तर्राष्ट्रिय विश्वास दुवैसँग जोडिएको प्रश्न हो । नेपालले दातृ निकाय र विकास साझेदारसँग गरेका सम्झौता तथा प्रतिबद्धतालाई समयमै कार्यान्वयन गर्न नसकेको संकेत दिएको छ यसले । साथै दातृ निकायले प्रतिबद्धता जनाएको करिब ३० अर्ब रुपियाँ बराबरको सहायतासमेत नेपालले उपयोग गर्न सकेन । यसको अर्थ, समस्या स्रोतको अभावभन्दा बढी कार्यान्वयन क्षमता, आयोजना व्यवस्थापन, सार्वजनिक खरिद प्रक्रिया, नीतिगत स्थिरता र प्रशासनिक दक्षतामा रहेको देखिएको छ ।