कांग्रेसमा ‘एकता अभियान’ सुरु, शीर्ष नेतृत्वलाई मतभेद अन्त्य गर्न युवा नेताहरूको दबाब

नेपाली कांग्रेसका युवा नेताहरूले पार्टीभित्र बढ्दो आन्तरिक विवाद अन्त्य गर्दै संगठनलाई एकताबद्ध बनाउन ‘देश र कांग्रेस जोड्ने अभियान’ सुरु गरेका छन्। काठमाडौंको बानेश्वरमा आइतबार आयोजित भेलापछि उनीहरूले ‘राष्ट्रका लागि कांग्रेस, कांग्रेसका लागि एकता’ भन्ने नारासहित अभियानको औपचारिक घोषणा गरेका हुन्।

अभियानको घोषणा गर्दै नेविसंघका पूर्वअध्यक्ष नैनसिंह महरले लामो समयदेखि पार्टीभित्र बढ्दै गएको मतभेद, अविश्वास र आन्तरिक किचलोले कांग्रेसको संगठनात्मक शक्ति कमजोर बन्दै गएको बताए। उनका अनुसार नेपाली कांग्रेस अहिले पार्टी एकताको गम्भीर परीक्षणको चरणबाट गुज्रिरहेको छ।