चेतना पौडेल पक्राउ प्रकरण : विवादको कडी के हो ?

काठमाडौँ । गैरकानुनी रूपमा चिकित्सा अभ्यासमा संलग्न भएको भन्दै चेतना ए.एम (पौडेल) लाई प्रहरी प्रधान कार्यालय केन्द्रीय अनुसन्धान ब्युरोले पक्राउ गर्‍यो । पौडेल पक्राउको मुख्य कारण नपाएको चिकित्सकको उपाधिको प्रयोग गरेको प्रहरीको विज्ञप्तिमा उल्लेख छ ।

गत असार १० गते चन्द्रागिरि नगरपालिका–८ बाट पौडेललाई सीआइबीले पक्राउ गरेसँगै सरोकारवाला सङ्घ संस्थाले आपत्ति जनाए । पौडेलमाथि नेपाल मेडिकल काउन्सिल दर्ता प्रमाणपत्र प्राप्त नगरी बिरामीहरूको आधुनिक चिकित्सा निदान उपचारमा संलग्न रहेको, बिरामीलाई औषधी सिफारिस गरिएको प्रेस्क्रिप्शन सहित फेला परेको अभियोग छ ।