शुल्कले होइन, विश्वासले जोडिन्छन् विद्यालय र अभिभावक

शिक्षा कुनै वस्तु होइन, जसको मूल्य किनबेचबाट मात्र निर्धारण गर्न सकियोस्। यो व्यक्तिको ज्ञान, सीप, चरित्र, संस्कार र भविष्य निर्माण गर्ने सामाजिक प्रक्रिया हो। त्यसैले शिक्षाको केन्द्रमा सधैं विद्यार्थी हुनुपर्छ। तर विद्यार्थीको भविष्य निर्माण गर्ने जिम्मेवारी विद्यालयको मात्र होइन। परिवार, समाज र राज्य सबै यसका साझेदार हुन्।

नेपालको शिक्षा प्रणालीमा निजी विद्यालयले तीन दशकभन्दा लामो समयदेखि महत्त्वपूर्ण भूमिका निर्वाह गर्दै आएका छन्। सामुदायिक विद्यालयसँगै निजी विद्यालयले पनि लाखौं विद्यार्थीलाई शिक्षा प्रदान गरिरहेका छन्। आधुनिक शिक्षण पद्धति, अतिरिक्त क्रियाकलाप, भाषा दक्षता, प्रविधिको प्रयोग र व्यवस्थित सञ्चालनका कारण धेरै अभिभावक निजी विद्यालयतर्फ आकर्षित भएका छन्।