महेश्वर दाहालको टिप्पणी : ‘अब कम्युनिस्ट आन्दोलनलाई नयाँ वैचारिक बहस र नयाँ नेतृत्व चाहिन्छ’

काठमाडौं- सञ्चारकर्मी तथा राजनीतिक विश्लेषक महेश्वर दाहालले वरिष्ठ नेता झलनाथ खनालद्वारा लिखित ‘वैज्ञानिक समाजवाद कि बहुदलीय जनवाद !’ पुस्तकले नेपाली कम्युनिस्ट आन्दोलनमा नयाँ वैचारिक बहसको सुरुआत गरेको बताएका छन् ।

पुस्तकमाथि समीक्षा प्रस्तुत गर्दै दाहालले यो कृति बहुदलीय जनवादको आलोचनामा मात्र सीमित नभई कम्युनिस्ट आन्दोलनभित्रको आत्मसमीक्षा, वैचारिक पुनर्निर्माण र भविष्यको दिशाबारे गम्भीर प्रश्न उठाउने दस्तावेज भएको बताए । उनका अनुसार लेखकले आफ्नै आन्दोलनका कमजोरी, नेतृत्वको वैचारिक विचलन र गुटबन्दीबारे खुलेर समीक्षा गरेका छन्, जुन कम्युनिस्ट आन्दोलनका लागि सकारात्मक पक्ष हो ।